ഗ്രാമ പഞ്ചായത്തിന്റെ ചരിത്രം
അയ്മനത്തിന്റെ ചരിത്രം ഐതിഹ്യങ്ങളിലും യാഥാര്ത്ഥ്യങ്ങളിലും കോര്ത്തിണക്കപ്പെട്ടതാണ്. പഞ്ചപാണ്ഡവര് വനവാസകാലത്ത് താമസിച്ചിരുന്ന വനപ്രദേശത്തിന് ഐവര് വനം എന്ന പേരുണ്ടായതായും ക്രമേണ ഈ സ്ഥലം ഐമനം ആയി എന്നുമാണ് ഐതിഹ്യം. തെക്കുംകൂര്, ചെമ്പകശ്ശേരി എന്നീ നാട്ടുരാജാക്കന്മാരുടെ അധീനതയിലായിരുന്ന രണ്ടു ഭൂവിഭാഗങ്ങളായ കുടമാളൂരും അയ്മനവും കൂടി ചേര്ന്നുണ്ടായതാണ് ഇന്നത്തെ അയ്മനം ഗ്രാമപഞ്ചായത്ത്. കുമാരനല്ലൂര് ക്ഷേത്രത്തിലെ ഊരാണ്മസ്ഥാനം നഷ്ടപ്പെട്ട ചെമ്പകശ്ശേരി മനയിലെ വിധവയും മകന് ഉണ്ണി നമ്പൂതിരിയും മുത്തശ്ശിയും അയ്മനം എന്ന പേരിലറിയപ്പെട്ടിരുന്ന ഇവരുടെ ആശ്രിതനും കൂടി തിരുവിതാംകൂറുകാരായ ചില പട്ടാളക്കാരുടെ സഹായത്തോടെ തെക്കുംകൂര് രാജാവില് നിന്നും കൌശലപൂര്വ്വം നേടിയ പ്രദേശമാണ് കുടമാളൂര്. ഉണ്ണിനമ്പൂതിരിയുടെയും മറ്റും ദയനീയ സ്ഥിതി മനസിലാക്കിയ തെക്കുംകൂര് രാജാവ് ഉടവാള് കൊണ്ട് ഒരു ദിവസം വെട്ടിപ്പിടിക്കാവുന്ന സ്ഥലം തന്റെ രാജ്യത്തുനിന്നും സ്വന്തമാക്കിക്കൊള്ളാന് കല്പിച്ചുപോലും, സമര്ത്ഥനായ അയ്മനം പട്ടാളക്കാരുടെ സഹായത്താല് രാജാവുനല്കിയ ഉടവാള് കൊണ്ട് വെട്ടിപ്പിടിച്ച ഊര് അഥവാ ദേശം കാലക്രമേണ കുടമാളൂര് എന്നു പ്രസിദ്ധമായി എന്നാണ് ഒരൈതിഹ്യം. ചെമ്പകശ്ശേരി രാജസദസ്സിലെ കവിയായിരുന്ന കുഞ്ചന് നമ്പ്യാര് കുടമാളൂരില് താമസിച്ചാണ് കിരാതം വഞ്ചിപ്പാട്ട് എഴുതിയിട്ടുള്ളത് എന്നു ചില രേഖകളില് കാണാം. കുടമാളൂര് ചെമ്പകശ്ശേരി മന്ത്രിമാരുടെ ആസ്ഥാനമായിരുന്നെങ്കില്, അയ്മനം തെക്കുംകൂര് മന്ത്രിമാരുടെ ആസ്ഥാനമായിരുന്നു. കോട്ടയും കൊട്ടാരവും സ്ഥിതി ചെയ്തിരുന്ന തളികോട്ട അയ്മനത്തിന്റെ തെക്കെ അതിര്ത്തിയിലായിരുന്നു. പിന്നോക്ക വിഭാഗത്തില്പ്പെട്ട ചേരമര് സഭ, ഭരതര് മഹാസഭ, വണിക വൈശ്യസംഘം, വിശ്വബ്രഹ്മ സമാജം, വിശ്വകര്മ്മസഭ എന്നിവയും ഈ പഞ്ചായത്തിന്റെ വിവിധ ഭാഗങ്ങളിലായി പ്രവര്ത്തിക്കുന്നു. രാജഭരണം അവസാനിച്ചിട്ടും ജന്മിത്വം ശക്തമായി നിലനിന്നിരുന്ന ഒരു പ്രദേശമായിരുന്നു അയ്മനം. സ്വാതന്ത്ര്യത്തിനു ശേഷവും അയ്മനം പഞ്ചായത്തിലെ കൃഷി ഭൂമി മുഴുവന് മൂന്നു ജന്മിമാരുടെ കൈവശമായിരുന്നു. പുന്നപ്ര വയലാര് സമരത്തില് നിന്നും പ്രചോദനം ഉള്ക്കൊണ്ട് അഖില തിരുവിതാംകൂര് കര്ഷക തൊളിലാളി യൂണിയന് മങ്കൊമ്പ് കേന്ദ്രമാക്കി രൂപം കൊണ്ടു. അഖില തിരുവിതാംകൂര് കര്ഷക തൊഴിലാളി യൂണിയന്റെ നേതൃത്വത്തില് കൂലിക്കും പതത്തിനും വേണ്ടി പല ഭാഗങ്ങളിലും സമരങ്ങള് നടത്തുകയുണ്ടായി.
സാംസ്കാരിക ചരിത്രം
കുടമാളൂര് കരികുളങ്ങര ദേവിക്ഷേത്രത്തിലെ ഒറ്റതൂക്കം എന്ന വഴിപാട് കേരളത്തിലെ അപൂര്വ്വം ചില ക്ഷേത്രങ്ങളില് മാത്രം കണ്ടു വരുന്ന ഒരു പ്രത്യേക ചടങ്ങാണ്. പരിപ്പ് ശിലക്ഷേത്രത്തിലെ മേടം ഉല്സവം, അയ്മനം നരസിംഹപുരം ക്ഷേത്രത്തിലെ ചിങ്ങമാസത്തിലെ തിരുവോണനാളിലെ ആറാട്ട്, കുമ്മനം ഇളങ്കാവ് ക്ഷേത്രത്തിലെ മീനഭരണി ഉല്സവത്തോടനുബന്ധിച്ച് കുത്തിയോട്ടം എന്നിവയൊക്കെ സാംസ്കാരിക പാരമ്പര്യം വിളിച്ചറിയിക്കുന്ന ഉല്സവാഘോഷങ്ങളാണ്. കുടമാളൂര് സെന്റ് മേരീസ് പള്ളിയില് ദു:ഖവെള്ളിയാഴ്ച ദിവസം നടക്കുന്ന നീന്തുനേര്ച്ച വളരെ പ്രസിദ്ധമാണ്. ഹൈന്ദവരും ക്രിസ്ത്യാനികളും മുസ്ളീങ്ങളുമാണീ ഗ്രാമത്തിലെ പ്രധാന മതവിഭാഗങ്ങള്. അവരുടെ ആരാധനാലയങ്ങളെ കേന്ദ്രമാക്കി വ്യത്യസ്തങ്ങളും വൈവിദ്ധ്യങ്ങളുമായ വിവിധ ആഘോഷങ്ങള് ആചാരവിധിപ്രകാരം നടത്തിവരുന്നു. കുടമാളൂരില് സി.വി.എന്.കളരിയും, കുടയംപടിയില് ഗരുഡ ജിംനേഷ്യവും കായികരംഗത്ത് മികച്ച പരിശീലനങ്ങള് നല്കിവരുന്നു. പ്രൊഫ: അയ്മനം കൃഷ്ണകൈമള് പ്രസിദ്ധനായ അദ്ധ്യാപകനും അറിയപ്പെടുന്ന ഗ്രന്ഥകാരനുമാണ്. അദ്ദേഹത്തിന്റെ ഡാക്ടര് ഫൌസ്റ്റ് എന്ന ആട്ടകഥ അനുവാചകരില് സ്ഥിരപ്രതിഷ്ഠനേടിയ ഗ്രന്ഥമാണ്. കഥകളി വേദികളിലെ നിത്യയൌവ്വനകളായ സ്ത്രീ കഥാപാത്രങ്ങളെ അവിസ്മരണീയമായ വിധത്തില് അരങ്ങില് അവതരിപ്പിച്ചിട്ടുള്ള കുടമാളൂര് കരുണാകരന് നായര് എന്ന അനുഗ്രഹീതകലാകാരന്റെ കലാരംഗത്തെ നിസ്തുലമായ സേവനങ്ങളുടെ അംഗീകാരം എന്ന നിലയില് അദ്ദേഹത്തിന്റെ ഷഷ്ഠ്യബ്ദിപൂര്ത്തിയോടനുബന്ധിച്ച് നിര്മ്മിച്ചിട്ടുള്ള കുടമാളൂര് കരുണാകരന് നായര് ഷഷ്ഠ്യബ്ദിപൂര്ത്തി സ്മാരകഹാള് എന്ന ദൃശ്യസ്മാരക മന്ദിരം അമ്പാടിക്കവലയ്ക്കു സമീപം തലയുയര്ത്തി നില്ക്കുന്നു. അഷ്ടവൈദ്യപ്രമുഖരില്പ്പെട്ട കൊട്ടാരക്കരവൈദ്യനായിരുന്ന ഒളശ്ശ ചിരട്ടമണ് മൂസ്സിന്റെ പിന്തുടര്ച്ചക്കാരനായ നാരായണമൂസ്സും വൈദ്യശാസ്ത്രരംഗത്ത് പ്രാഗല്ഭ്യം തെളിയിച്ച മഹത് വ്യക്തിയാണ്. നാടകലോകത്തും, സിനിമാവേദിയിലും തനതായ ശൈലിയിലൂടെ വ്യക്തിമുദ്രപതിപ്പിച്ച് തൊട്ടതൊക്കെ പൊന്നാക്കി ജ്വലിച്ചു നിന്ന എന്.എന്.പിള്ള, ഈ ഗ്രാമത്തിന്റെ മറ്റൊരു കീര്ത്തിസ്തംഭമാണ്.
കോട്ടയം ജില്ലയിലെ കോട്ടയം താലൂക്കില് ഏറ്റുമാനൂര് ബ്ളോക്കില് അയ്മനം, പെരുമ്പായിക്കാട് (ഭാഗികം) വില്ലേജുകള് ഉള്പ്പെടുന്ന ഗ്രാമപഞ്ചായത്താണ് അയ്മനം ഗ്രാമപഞ്ചായത്ത്. 30.03 ചതുരശ്ര കിലോമീറ്റര് വിസ്തീര്ണ്ണമുള്ള പഞ്ചായത്തിന്റെ അതിരുകള് വടക്ക് കുമാരനല്ലൂര്, ആര്പ്പൂക്കര പഞ്ചായത്തുകള്, കിഴക്ക് കുമാരനല്ലൂര് പഞ്ചായത്ത്, കോട്ടയം മുനിസിപ്പാലിറ്റി, പടിഞ്ഞാറ് കുമരകം പഞ്ചായത്ത്, ആലപ്പുഴ ജില്ലയിലെ മുഹമ്മ പഞ്ചായത്ത്, തെക്ക് തിരുവാര്പ്പ്, കുമരകം പഞ്ചായത്തുകള് എന്നിവയാണ്.
അയ്മനം ഒരര്ത്ഥത്തില് ദേവാലയങ്ങളുടെ നാടാണെന്നു പറയാം. ചെറുതും വലുതുമായ മുപ്പതോളം ഹൈന്ദവക്ഷേത്രങ്ങളും പത്തു ക്രൈസ്തവ ദേവാലായങ്ങളും രണ്ടു മുസ്ളീം പള്ളികളും ഇവിടെ ഉണ്ട്. ഇവ കൂടാതെ എസ്.എന്.ഡിപി. വകയായി നാല് ശ്രീനാരായണഗുരു മന്ദിരങ്ങളും രണ്ടു വിശ്വകര്മ്മക്ഷേത്രങ്ങളും ഉണ്ട്. രാജഭരണകാലം മുതലേ നായര് സര്വ്വീസ് സൊസൈറ്റി സജീവമായി സമുദായ ക്ഷേമ പ്രവര്ത്തനങ്ങള് നടത്തി വന്നിരുന്നു. പഞ്ചായത്തിലെ കരയോഗ പ്രവര്ത്തനം ആരംഭിച്ചത് പരിപ്പിലാണ്. പരിപ്പു കരയോഗത്തിന് കീഴില് ഒരു ഹൈസ്ക്കൂള് നല്ല നിലയില് പ്രവര്ത്തിക്കുന്നു. കോട്ടയം ജില്ലയിലെ പൂഞ്ഞാര് മലകളില് നിന്നാരംഭിച്ച് മീനച്ചില്, കോട്ടയം താലൂക്കുകളിലെ വിവിധ പ്രദേശങ്ങളിലൂടെ ഒഴുകി വേമ്പനാട്ടു കായലില് പതിക്കുന്ന മീനച്ചിലാറിന്റെ ചുങ്കം, കുടമാളൂര് എന്നീ കൈവഴികളാല് ചുറ്റപ്പെട്ടു കിടക്കുന്ന ഈര്പ്പമുള്ള താഴ്വര പ്രദേശമാണ് അയ്മനം. ധാരാളം തോടുകളും വേമ്പനാട്ടു കായലിന്റെ ഭാഗവും മീനച്ചിലാറിന്റെ കൈവഴികളുമാണ് ജലസ്രോതസ്സുകള്. പൊതുവേ ഫലപുഷ്ടിയുള്ള മണ്ണാണ് ഇവിടെ കാണപ്പെടുന്നത്. പൊതുവേ ഗ്രാമം കിഴക്കു നിന്നും പടിഞ്ഞാറോട്ടു ചരിഞ്ഞു കിടക്കുന്നു. ഒരുകാലത്ത് സവര്ണ്ണ മേധാവിത്വവും ജാതിപരമായ ഉച്ചനീചത്വങ്ങളും ശക്തമായി നിലനിന്നിരുന്ന പ്രദേശമായിരുന്നു അയ്മനം. വിദ്യാഭ്യാസ രംഗത്ത് കോട്ടയം ജില്ലയില് മുന്പന്തിയില് നില്ക്കുന്ന ഒരു പ്രദേശമാണ് അയ്മനം. ബ്രിട്ടീഷ് കോളനിവാഴ്ചയും മിഷനറിമാരുടെ പ്രവര്ത്തനവും ഈ പ്രദേശത്തിന്റെ സംസ്കാര പൈതൃകത്തെ ആംഗലേയ സ്വാധീനത്തില് തളച്ചിടുകയുണ്ടായി. നാട്ടുരാജ്യങ്ങളുടെ പ്രഭാവകാലത്ത് ക്ഷേത്രങ്ങളെ കേന്ദ്രീകരിച്ചാണ് അയ്മനത്തിന്റെ സംസ്കൃതി രൂപപ്പെട്ടിട്ടുള്ളത്. ചെമ്പകശ്ശേരി രാജാവിന്റെ ആശ്രിതനായിരുന്ന കുഞ്ചന് നമ്പ്യാര് കുടമാളൂര് വാസുദേവപുരം ക്ഷേത്രത്തിന്റെ വടക്കേ ഗോപുരത്തിലിരുന്നാണ് കിരാതം വഞ്ചിപ്പാട്ട് എഴുതിയിട്ടുള്ളത് എന്നു ചില രേഖകളില് കാണുന്നു.